Li Spanyayê xwaringehên Doner-Kebabê bûne navendên çanda Kurdî

Dara Darî ji Kobanî li pêşiya lokalê xwe ala Kurdistanê nîşan dike

Rûdaw / Z.A: Hebûna revenda kurdî li Spanyayê xwedî temenkî kin e. Ji sala 2000î û vir de hejmara Kurdan li vî welatî roj bi roj zêdetir dibe, piraniya wan jî ji bakur û rojavayê Kurdistanê ne û di xwaringehên Doner-Kebaban de dixebitin. Ew bûne xwedî fabrîka û fîrmeyên mezin, weke Istanbul û Nemrût ku li gelek bajarên spanî belav bûne. Gelek ji wan bi rêya navên xwaringehan dixwazin balê bikşînin ser Kurdan, wekî navên Kurdistan, Zagros, Kurd, Kobanî, Dêrsim, Newroz, Siwar û hwd. Kurdên Spanyayê her wisa hewl didin bi rêya mûzîka xwe, wêneyên gund û bajarên xwe, wêneyên cil û şahiyên kurdan balê bikşnin ser hebûna netewa kurd.

“Tûrîst ji me ecêb dimînin…”

Li paytext Madrîdê me berê xwe da xwaringeha Kurdistanê, xwaringeha ku wek balyozxaneya Kurdistanê tê naskirin, ji ber ku ew li navenda Madrîdê ye û herdem bixêrhatina Kurdan dike. Digel ku xwediyê xwaringehê spanî ye, lê herdem Kurd têde dixebitin û bi rêve dibin. Em li wir rastî Dara hatin, yek ji wan xortên ku ji bakurê Afrîkayê derbasî xaka Spanyayê bûne. Hemû jî ji rojavayê Kurdistanê, ji bajarê Kobanî ne. Di hundirê xwaringehê de ala Kurdistanê li ser dîwar hatiye danîn û li ser bi spanî “Azadî ji Kurdistanê” hatiye nivîsandin. Li ser karta xwarinê jî nexşeya Kurdistanê hatiye danîn. Li Spanyayê ji ber nebûna dezgeh û komeleyên ku behsa Kurdistanê bikin, gelek kes Kurdan nas nakin.  Dara ji Rûdawê re vê yekê wiha şîrove dike: “Mixabin li vir gelek kes Kurdan nas nake, hem spanî hem jî hemwelatiyê Amerîka Latînî. Li vî welatî tenê Baskî me baş nas dikin. Her wiha gelek tûrîst li vir nan dixwin û em ji wan re behsa gelê kurd dikin û nexşeya Kurdistanê pêşî wan dikin. Gelekên wan ecêb dimînin û dipirsin: Ji bo çi hûn 40 mîlyon in û heya niha jî hûn nebûn xwedî dewlet?”

Dara û hevalên xwe Doner-kebabê weke xwarineke kurdî pêşkêş dikin, di menûya wan ya xwarinê de salata kurdî û çayê kurdî jî nivîsandine.

Zekî ji Nisêbînê lokala Istanbul Kebab bi rêve dibe

“Sultan Istanbul” dibe Mêrdîn

Li bajarê Ciudad Real, yê ku dikeve herêma La Mançayê, me serdana “Sultan Istanbul” kir. Zekî Acarê ji Nisêbînê vê xwaringehê bi rêve dibe. Ev 8 sal in ew li Spanyayê dijî û li vir fêrî karê çêkirina Kebaban bûye. Zekî salekê çûbû Almanayayê jî û li wir fêrî gelek tiştan bûbû di karê çêkirina Donerê de, “li wir şaştiyên ku min li Spanyayê dikir min naskirin, min ezmûneke baş wergirt. Niha jî ev bû mehek ku em li vir kar dikin û karê me baş diçe.”

Navê xwaringehê Kurdên vî bajarî aciz kirin, nemaze ku di bin navê xwaringehê de “metbexa tirkî” hatiye nivîsandin. Zekî derbarê vê rexneyê de ji Rûdawê re got: “Sultan Istanbul navekî bazirganî ye, ev xwarin bêtir bi navê Tirkan hatiye naskirin, ti kes Kurdan nas nake”, lê Zekî tekez dike her kesê ku tê wir, ew ji wan re dibêje ku ew Kurd e û ji wan re behsa Kurdan dike. Zekî bi rûkenî li hemberî vê rexneyê dibêje: “Tişt nabe, ezê di pêşerojê de nav bikim Mêrdîn an jî Mezopotamya”.

Kurdistan kebab

“Partiyên kurdî bi awayekî lojîstîk hevkariya me nakin”

Di dekorasyona xwaringeha “Sultan Istanbul” de bêtir bajarê Stenbolê û kelepûra Rojhilata Navîn bi gîştî tê nîşandan. “Me dekora xwe ji Stenbolê aniye, mixabin min wêneyên bajarên Kurdistanê peyda nekirine. Lê dixwazim ku xwendevanên Rûdawê vê yekê zanibin ku partiyên me alîkariya me nakin ku em tiştên kurdî li xwaringeha xwe bi cih bikin. Ka bila poster û wêneyên Kurdistanê bînin, da ku em li xwaringehê nîşan bikin, lê ew tenê dizanin di dema kampanya topkirina pereyan de serdana me bikin. Ne rojnameyekê, ne wêneyekî jî bi xwe re tînin”, Zêkî rexneyan li rêxistinên kurdî dike. Zekî radibe û çend broşûrên bi zimanê spanî ku behsa Nemrûdê, Amedê û Mêrdînê dikin  nîşanî me dike û dibêje ku balyozxaneya tirkan ji wî re şandine. “Ti kes bi awayekî lojîstîk hevkariya me nake ku em bikaribin Kurdistanê bi xelkê bidin naskirin”, Zekî bi êş dibêje.

Helîme û Hemû ji gundê Feqîra/Efrînê bi hevre xebata xwe dikin

Di heman bajarê ku “Sultan Istanbul” lê ye, xwaringeheke din ya kebabê bi navê Medya heye ku Helîme û hevserê xwe Hemû bi rêve dibin. Helîme û Hemû ji Efrînê ne û ev bûn deh sal ku karê Donerê dikin. Wan dîwarên xwaringehê bi wêneyên xwezayî yên herêma Kurdaxê xemlandine. “Gelek kes li wateya navê xwaringehê dipirsin û ka em ji kîjan welatî ne, em jî ji wan re behsa Kurdan dikim”, Hemû vedibêje. Helîme jî wiha didomîne: “Mûzîk û wêne bala wan dikîşnin, ez ji wan re dibêjim ev mûzîka Kurdan e, ev jî wêneyên şahiyên me, cilên me, gund û bajarên me ne”

Kurd Kebab
Advertisements

One thought on “Li Spanyayê xwaringehên Doner-Kebabê bûne navendên çanda Kurdî

  1. Dest sax bin Zinar,

    Peyvên Helîmê hêsir bi çavên min xistin,,,,” ez ji wan re dibêjim ev mûzîka Kurdan e, ev jî wêneyên şahiyên me, cilên me, gund û bajarên me ne”

Şîrove û nêrînên we

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s