Şîrîn dixwaze li Silêmaniyê jî bêje “Welatê me Kurdistan e”

Şîrîn di cejna Newrozê de strana Welatê min Kurdistan e distre
Şîrîn di cejna Newrozê de strana “Welatê min Kurdistan e” distre /Foto: The Silent Revolution

Rûdaw / Z.A – Spas ji xebata dokûmenterî ya bi navê “The Silent Revolution” re, bi rêya wê me karîbû perçeyekî ji strana “Welatê me Kurdistan e” bi dengê zaroka dengxweş Şîrîn Beko guhdarî bikira. Şîrîn beriya 14 salan li bajarokê Cindrêsê yê ser bi Efrînê ji dayîk bûye, ji çar saliya xwe de distre û ji heyşt saliya xwe ve beşdarî konseran dibe. Lê îsal di şahiya Newrozê de karîbû bo cara yekemîn bi kurdî li pêşiya bi hezaran kesan ji xelkê Kurdaxê bistirê.

Bi rêya Facebookê me xwe gihand Şîrînê, me jê re bi kurdî dinivîsand, wê jî bi îngilîzî dibersivand: “Bibore nizanim bi kurdî binivîsînim”, piştre me axaftina xwe bi rêya Skype domand, me guman dikir ku ew li Efrînê be: “Na, ez niha li Kurdistanê me. Beriya sê mehan ez ligel diya xwe ji Efrînê derketim û hatim mala xwişka xwe li Silêmaniyê.” Sedema koçberbûna Şîrînê nearamiya rewşê bû, ya ji ber êrişên grûpên tundrew yên ser Efrînê: “Gellek caran me xew nedikir, em ditirsiyan ku fîşek anjî moşek bigihijin mala me.” Nizimbûna asta perwerdehiya li dibistanan sedemeke din bû ji bo koçkirinê: “Dibistan ne bi rêkûpêk e, ne xwendin maye û ne jî pêşeroj”.

Li Silêmaniyê dilteng bûye

Li Silêmaniyê Şîrînê dil hebû ku herê dibistanekê, ji bo ku zimanê xwe yê îngilîzî xurt bike û xwe li enstîtûyeke mûzîkê qeyd bike. Ew hez dike derfetên dengê xwe bi awayekî akademîk bi pêş bixîne û fêrî lêxistina amûreke mûzîkê bibe, lê li Silêmaniyê ew rastî kêşeya zaravayê soranî hatiye, ew li paytexta çandî ya Herêma Kurdistanê tengijî ye û weke li Efrînê dixwaze li wir jî stranan bibêje, lê nizanê li kû derê.

Foto: The Silent Revolution
Foto: The Silent Revolution

Em vedigerin Kurdaxê û ji Şîrînê pirs dikin, derbarê gavên wê yên pêşîn di jiyana wê ya hunerî de: “Hemû mamosteyan, nemaze yê mûzîkê, piştgiriya min dikirin, destekdana wî motîvek li ba min çêkir ku ez bêhtir stranan ezber bikim. Cara yekê ku ez derketim ser sehneyê ez heyşt salî bûm û min pola duyemîn dixwend, min li şanoya Cindirêsê stran gotin û ji wê çaxê de jî ez beşdarî konseran dibim.” Weke pirraniya zarokên xwedî talent, li Rojava Şîrînê piştgiriyeke berçav ji malbata xwe nedîtibû lê ew xwedî vîneke xurt e û ti kes nikare li hemeber evîna wê ya stranbêjiyê re bibe kelem: “Malbata min piştgiriya min kir, lê ne zêde. Ez lomê ji xwedanên xwe nakim, tu dizanî ku civaka me bi çavekî nebaş li stranbêjan dinêre, lê digel vê yekê jî min xwest ez di vê rêyê de bimeşim û bi pêş de herim.”

Stranên Ûm Kulsûm û Feyrozê dixwîne

Şîrînê berê stranên kurdî ezber nedikirin, ji ber ku bi hebûna rejîma Baas cih ji wan stranan re tine bû. Zelalbûn û xurtbûna dengê Şîrînê derfetê dide wê ku stranên hunermendên ereb yên mezin bixwîne, weke Ûm Kulsûm, Werda Cezayîrî, Feyrûz û Esmehanê. Cara yekemîn ku wê li ser dikê bi kurdî stra, îsal di şahiya Newrozê de bû, ku cara yekemîn bêyî amadebûna zilamên Baasê hat pîrozkirin. Lê beriya ku derkevê ser sehneyê, wê hazirtiya xwe di enstîtûyeke mûzîkê de bi navê Arya li Cindirêsê kiribû: “Grûpa Arya ez vexwendim navenda xwe û ji min re gotin ku ewê bi belaşî dersên mûzîkê bidin min, bi şertê ku ez ligel wan beşdarî şahiyan bibim. Dema Newrozê jî partiyên kurdî em vexwendin şahiyê, ew jî cara yekê bû ku min bi kurdî stra.” Şîrîn hêvara 20ê Adarê wiha bi bîr tîne: “Xelk gellek bû û nedihatin hejmartin. Ez jî pirr kêfxweş bûm ku min li pêşiya gelê xwe stranek li ser welatê xwe xwend, ez bi vê yekê gellekî serbilind bûm”.

Şîrîn yek ji wan kesên sereke ye ku di dokûmentera “The Silent Revolution” de cih digrin, wê bi saya zanîna zimanê îngilîzî xwe gihand derhênerên dokûmenterê. Derbarê naskirina derhênerê dokûmenterê de, Şîrîn dibêje: “Rojekê du rojnamevan ji Spanyayê hatibûn serdana me, mamosteyê zimanê îngilîzî ji me xwest ku em ligel wan biaxivin. Dema hatin jî, min gellek pirs derbarê dîrok, çand û civaka wan de ji wan kirin. Piştî ku wan naskir ku ez stranan dibêjim, xwestin ez ji wan re bistirêm û vîdyo ji min re kişandin. Piştre jî li şahiya Newrozê dîmenên min girtin û hevpeyvînek bi min re çêkirin”.

Çavên Şîrînê li ser Kurdaxê ne, ku rewş rihet bibe ewê vegerê dibistana xwe. Lê ew niha li Silêmaniyê ye û bi hêvî ye ku grûpeke mûzîkê bibîne, da ku bikaribe bêhna xwe tê de bistîne û hestên xwe bi rêya stranbêjiyê vebêje.

Advertisements

Şîrove û nêrînên we

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s