Feeds:
Posts
Comments

Posts Tagged ‘Münster’

img_0286

Hunermend Muharram ligel cemawerê “Roja Çanda Kurdî” li Bonnê / Foto: Z.A

Roja şemiya borî 24 îlonê, di çarçoveya çalakiyên hefteya navçandî de “Interkulturelle Woche 2016”, ez beşdarî du çalakiyan bûm. Sibê ez li bajarê Münsterê bûm, min û hevalên xwe di Komele Odakê de li ser sehnê me govenda kurdî û yewnanî gerand, me dîlanên wek sertakî (reqsa Zorba), bagiyê, çepkî girt. Di dîlana dawî de jî em ji ser sehnê daketin û me xelkê jî tevlî dîlana Delîlo kir. Ji bo temşekirina dîlana me, li ser vê girêdanê bitikîne: www.facebook.com/sabir.akdemir/posts/1281741091845342

Xwediyê blogê di serkêşiya govenda bagiyê de / Foto: Odak

              Xwediyê blogê serkêşiya govenda bagiyê dike / Foto: Odak

Hêvarê jî demjimêr 17:00 li bajarê Bonnê Navenda Kurdî ji bo Lêkolîn û Rawêjkariya û Yasayî (YASA) Roja Çanda Kurdî” li navenda MigraPolis pîroz kir.  Di agahiya ragihandin çalakiyê de ser Facebookê de, di derbarê kesên beşdar  di çalakiyê de ti înformasiyon nehatîbûn belavkirin.

 Baş e, kesê ku çalakî birêvebirbû endamê YASA Aref Gabeau bû.

 Helbestvan jî Hidir Çelik, Ulrich Bergmann û Hussein M. Habasch bûn.

Hunermend jî Muharram Dogan û hevsera wî Fîdan bûn.

Di despêka çalakiyê de kurtefîlma derhêner Akram Kiro  “Havîna Sar”  hate nîaşandanfîlm di navbera Kurdistan û Almanya hatiye kişandin û behsa jiyana penabrekî kurd li Almanya û jiyana wî ya berê li welêt dike.

Piştî ku helbestvan helbestên xwe xwendin, min rêdan ji birêvebirê çalakiyê xwest ji bo xwendina helbestek kurt, min helbest di pirtûkek ya nivîsakara swîsrî Jacqueline Sammali de  xwendibû, helbest jî anonîm e. Piştî xwendina helbestê jinek alman hat ba min ji bo ez helbestê jê re wergerînim, helbest jî wisa ye:

Keça min bi girî vegeriya,
Keça min bi girî vegeriya,
Min got mamoste bi tiştekî nizane,
Min got mamoste bi tiştekî nizane,
Min dixwest ez li nexçeyê binêrim,
Min dixwest ez li nexwşeyê binêrim.
Lê ew gote min:
“Kurdistan tune ye”
Keça min bi girî vegeriya.

Di beşê mûzîkê de jî Muharram û hevjîna wê Fîdan hêvara Roja Çanda Kurdî bi gotina stranên gelêrî pir xweş kirin, cemawerê çalakiyê jî ligel wan stran xwendin.

Piştî wan jî dîsa min rêdan ji kek Arif xwest ji bo ez stranekê kurt bêjim lê ew “di min de şikand”*, min dixwest ez strana “Lê Narînê” bixwînim ku min berî 5  mehan li welatê Baskê xwendibû û ji aliyê xelkê pir hatibû hezkirin. Lê piştre, dema girêdana dîlana efrînî, min li ber dengê def û zirnê perçeyek biçûk ji Eyşa Îbê da û min xwe hênik kir.

Bi gîştî çalakî xweş bû, hinekî cih biçûk bû û mêvanên biyanî (yên alman û ji netewên din) jî hindik bûn, ji ber ku tiştê herî girîng ji organîzekirina van çalakiyan danasîna alman û biyaniyan bi çanda kurdan ve. Tiştê nexweş bû jî ku mirov di “Roja Çanda Kurdî” de axaftina erebî  di danûstandina  hinekan de guhdarî bike.  Mixabin  xwarina kurdî jî tune bû, li kêleka vewxwarinan tenê Snack Brezel hebû. Hinekî nan, zêt û zaater jî hebûyana wê pir xweş biba, nemaze ji bo kesê bi zikê birçî ji Münsterê hatibû çalakiyê.

* “Di min de şikand”: derbirînek efrînî ye ku tê wateya daxwaza min bi cih nekir.

Ji bo temaşekirina wêneyên din: Yasa Kultur

Read Full Post »

Xwepêşander di despêka meşa xwe li pêşiya stasiyona navnendî ya Mûnsterê / Rûdaw

Rûdaw /Z.A  – Roja şemiya borî 22/12 derdorê 100 runiştvanên kurd yên bajarê Mûnsterê û derdora wê xwepêşandanekê ji bo şermezarkirina komkujiyên Mereş û Roboskî  lidarxistin. Xwepêşander li pêşiya stasiyona navendî  ya bajêr civiyan û wêneyên qurbanên komkujiyan û yên serokê PKKê Abdullah Oclalan hildan, her wisa du pankart bi almanî hebûn “Ji Mereşê heya Roboskî, êdî komkujiyan bi dawî bînin” û “Bila Patriyotên alman ji Kurdistanê derkevin”.

Lê berî destpêkirina meşê asayîşekî payebilind alman nêzîkî grûpeke zarok û nûciwanan bû, wan belavok didan xelkê û îmze ji bo azadiya Ocalan kom dikirin. Wî jî ji keçikekê xwest ku ew sembolên li ser qemîsan neyên nîşandan ji ber ku di nêrîna wî de ew sembolên PKKê ne. Qemîs dişibihin ala KCKê (Koma Civakên Kurdistanê), li ser wan qemîsên reş stêrekeke sor di hundirê sêlika rojê de hatiye neqeşkirin. Sultane Akbaş yek ji wan keçikan bû, yên ku wan qemîsan li xwe kiribûn, wê li hember helwesta polîsa alman heyirî bû, Sultan ji Rûdawê re got: “Me li ser navên ciwanên Kurd li Mûnsterê van qemîsan çêkir, polîsan wê çaxê jî ji me re gotibûn hûn dikarin van qemîsan li xwe bikin, niha jî ev polîs dibêje van sembolan veşêrin ji ber ku qedexe ne”, Sultane û hevalên wê neçar man ku desmalan li dor hustiyên xwe bigerînin û sembolan veşêrin”.

Foto: Rûdaw

Piştre xwepêşander ber bi bajarê kevnar  meşiyan û sloganan bi almanî avêtin weke “Almanya fînanse dike û Tirkiyê bombebaran dike”, “Turkiyê terorîst e”, navenda bajêr jî bi xelkê tijî bûbû nemaze ku ew roja dawî bû ya Weihnachtsmarkt (Bazara Cejna Zayînê), pankartên ku bi almanî hatibûn nivîsandin bala gellek hemwelatiyên alman dikişandin.

Alî Atalan: Dewleta alman û Tirkiyê di zulmê de şîrîkê hev in

Kevneparlementerê partiya Çep ya eyaleta NRWê Alî Atalan beşdarî meşê bû, wî nerazîbûna xwe derbarê helwetsa dewleta alman anî zimên ya ku bi rokêtên Patriot parastina Tirkiyê dike lê parastina mafê mirovan li wî welatî piştguh dike, Atalan ji Rûdawê re got “Dewleta alman şirîkê Tirkiyê ye di wê siyaseta înkarkirinê ya ku li dijî hindekahiyên olî û netewî tê birêvebirin, kesê ku dibe alîgirê aliyê ku zilmê dike şîrîkatiya wî jî dike”.

Piştî rawestandinekê li pêşiya avahiya şaraderiyê xwepêşander berê xwe dan konsolxaneya Tirkiyê û dema nêzî cadeya kosolxaneyê bûn sloganan bi tirkî û kurdî yên derbarê piştgiriya gerîla, Ocalan û şeremezarkirina dewleta Tirk avêtin, li wir jî polîsa alman berbendek danîbûn lê wan hîştin ku du jinan perbenda hesinî derbas bikin û destegulek reş li pêşiya avahiya konsolosxaneyê deynin, xwepêşandan bi xwendina belavoka ya derbarê şermezarkirina komkujiyan bi dawî bû.

Read Full Post »

 

Ludgeriplatz / Münster (Foto: Z.A)

 

Duh dema ez diçûm cihê karê xwe di Call Center de ez rastî dîmenên balkêş hatim, baran bi ser bajarê Münster ve dibariya û komek ji ciwanên Alman li meydana Ludgeri (Ludgeriplatz) li hev kom bûbûn, alên almanî bilind rakiribûn û li ser rûyên xwe jî çap kiribûn.

Min biskêlêta xwe danî aliyekê û min dest bi kişandina wêne û vîdyoyan kir, her wiha wênekêşekî profesonel  û kamîreya televîzyonekê van dîmenan dikşandin.

Ciwanan ji bo çend xulekan astengî danîn pêşiya trafîkê, hemû di bin peykerên hesp û çêlekê de direqisîn, bîra û şerabê vedixwrain, li ser xwe û li ser erebeyan jî direşandin. Polîsê Alman bûyer ji nêz ve dişopand lê nêzîkî ciwanan nebû.

Keçek û xortek slogan bi riya mîkrofonê digotin, ciwanên din jî heman slogan dubare dikirin, slogana “Deutschland Deutschland” bilind radibû. Her wiha di nav wan alan de alekî din hebû, keçeke reş û bedew wê alê li ser pişta xwe danîbû û tevî alê direqisî. Min nizanî ew al ya kîjan welatî bû.

Piştre ez li bisklêta xwe siwar bûm û min berê xwe da Call Center, li ser rê gelek ciwanan alên Almanya ji penceryên erebeyên xwe derxistibûn û nîşanaên serkeftinê dikirin.

Di cihê kar de min ji hevalan re got ku li meyadana hesp û çêlekê ciwanan serkeftina almanya pîroz dikirin. Ji min re gotin serkeftina çi? Tu şaşî, Alamnaya 0-1 li hemberî Serbiya wendakir. Min jî got: Ach so (dîmek wisa ye). Wê çagê min nas kir ew ala Serbistanê bû.

Gelo mebesta van ciwanan çibû ji bo pîrozkirina wendakirina tîma xwe?
Ku tîma wan baş dilîst lê şans tune bû û lîskê wenda kir, yan jî xemnake me wenda kir lê dîsa hêvî heye ku em di pêşbirka kopaya Afrîkayê heya dawî berdewam bikin.

Mebesta wan çi be bila bibe, li sûna qehr û şîniyê dîsa baş e ku mirov wendakirinê pîroz bike, ji ber ku gihştina tîmekî ji mudiyala cîhanî re bi xwe serkeftinek e.

 

Ludgeriplatz / Münster (Foto: Z.A)

 

 

Ludgeriplatz / Münster (Foto: Z.A)

 

Read Full Post »

Avesta / Münster – Alî Atalan û Hamîde Akbayir du namezetên Kurd ji partiya Çep li Almanya (Die Linke) ji bo hilbijartinên ya Herêma Nordrhein Westfalen (NRW).

Alî Atalan li Mîdyadê  (Mêrdîn) di sala 1968 ji dayîk bûye, ev 25 sal in li Almanya dijî. Polîtîk û civaknasî li zanîngeha Bochum xwendiye û niha jî bi siyasetê di nav Die Linke de mijul dibe.

Ew namezetê partiya Çep (Die Linke) ya bajarê Munsterê ji bo hilbijratinê herêmî de yên ku di 9ê gulanê  li Herêma Nordrhein Westfalen wê bên lidarxistin.

Em li Münsterê rastî birêz Alî Atalan hatin û vê kurtehevpeyvînê pê re çêkir.

Gelo ankêtên girêdayî encamên hilbijartinan ji bo we posîtîv in?

Hêviya me di bidestxistina  serkeftinê de mezin e, li gorî ankêtên ku îro têne çêkirin, îhtîmala  bidesxistina kursiyan di parlamana  eyalatê mezin e, lê divê em di kampanya xwe de  baş tevbigerên ji bo em vê serkeftinê  garantî bikin.

Pankartên we hinekî dereng hatine belavkirin di kolan û meydanên  Munster de, hem kêm in hem jî biçûk in, partiyên weke CDU, SPD, FDP û yê Keskan (Grun) reklama namezetên xwe  baş kirine, sedema vê yekê çi ye?

Piraniya alîgirên me ji çîna karkeran e, derfetên me yên aborî hindik in. Di partiyên din de kesên dewlemend pir in, ew jî di hikûmetê de cih digrin û gelek alîkarî distînin. Lê mesele ne bi pirbûn û  mezinbûna pankartan e, yên dengên xwe didin partiya me li mezinbûna pankertan nanirin, baweriya wan bi me nayê şikandin.

Partiya we bi awakî gîştî  ji bo pêkanîna Azadiyê, Aşîtiyê, Edaleta Civakî û Wekheviyê, tevdigere, Gelo ji bo kurdan Die Linke çi dikare bike?

* Emê li ser vekirina dibisitanan ji bo fêrkirina zimanê Kurdî bixebitin.

* Pêşkêşkirina Alîkariyê ji bo  malbatên xizanan û penaberan bi awakî gîştî, her wiha ji bo  bidesxistina hemwelatiyê û mafê runiştinê.

* Emê tevbigerin ji bo rawestandina vegerandina penaberan bo wan  welatan ku mafên Kurdan binpê dikin weke Suriyê û Turkiyê.

Banga we ji bo hilbijêrên Kurd çi ye?

Em ji hemwelatiyên esil Kurd li vê Herêmê  hêvî dikim ku dengên xwe bidin partiya me, em du namezêtên Kurd di Die Link de cih digrin di van hilbijatinan de, hevala me  Hamîde Akbayir namezeta partiyê li bajarê Kölnê û ez li Münsterê.

Her wiha daxwaza me ji bo runiştvanên Herêmê  yên Kurd ku reklama me bikin, ji bo hemû dost, meriv  û hevalên xwe re bêjin ku dengên xwe bidin partiya me.

Avesta / Zinar Ala

Read Full Post »

Avesta – Duh danê êvarê Yekîtiya Xwendekarên Kurdistanê ya bajarê Münster bi amadebûna derdorê 150 kesan Newrozê pîroz kirin.

Xwendekarên Kurd  di zanîngeha Münsterê tevlî bi dehan malabtên Kurd û çend mêvanên Alman Cejna Newrozê pîroz kirin. Di nav mêvanan de namezetê partiya Die Linke ya bajarê Münsterê ji bo hilbijartinên Herêmî birêz Alî Atalan amade bûbû.

Programa şahiyê ji aliyê Sine û Hebûn dihate pêşkêşkirin. Dengbêj û grûpên beşdarî şahiyê bûbûn ev in:

Önder Deniz

Xemdar

Gulê

Heval Tehater

Folkorgruppe

Digel ku hejmara Kurdan li vê  bajarî beranberî bajarên din li Almanya pir kêm e, lê Kurdan du caran Newrozê pîroz kirin!

Avesta

Newroza Münster 20.03.2010 (Galeri)

Read Full Post »

%d bloggers like this: