Feeds:
Posts
Comments

Archive for the ‘Portugal’ Category

Siwar serê govendê dikşîne di şahiyeke Erasmûs de / Rûdaw

Porto (Rûdaw) – Erasmus bernameya xwendinê ya herî navdar e li Ewropayê. Navê Erasmus ji îngilîzî hatiye (European Region Action Scheme for the Mobility of University Students) û bi kurdî tê wateya “Plana Aksiyonê ya Civata Ewropî ji bo Gera Xwendekarên Zanîngehan”. Ev program ji sala 1987ê ve ava bûye ji bo hêsankirina gera akademisyen û xwendekaran di navbera zanîngehên welatên Yekîtiya Ewropayê de û ji bo xurtkirina hevkariyê di navbera zanîngehên ewropî de hatiye avakirin. Xwendekarên ji Tirkiyeyê jî sûdê ji vê bernameyê werdigirin, ji ber wê jî gellek xwendekarên kurd ji Bakurê Kurdistanê jî beşdarî vê programê dibin.

Mehmet Arda Özdal jî yek ji wan Kurdan e ku sûdê ji bernameya Erasmûsê werdigrê ye. Me Memo (wiha hez dike ku bê navkirin) li pêşiya avahiya zanîngeha Portoyê (duyemîn bajarê mezin li Portugalê) dît, ew di nav xwendekarên portugalî de bû ku li dijî reformên hikûmetê protesto dikirin. Memo li Amedê ji dayîk bûye û li Stenbolê înformatîk dixwîne, ev bûn sê meh ku ew hatiye bajarê Portoyê, ji bo ku semesterekê li wir bixwîne. Derbarê programa Erasmûsê Memo wiha dibêje: “Pirr baş e ku hikûmet alîkariyê bide xwendekaran, ji bo ku tevlî vê programê bibin. Lê mixabin pirraniya xwendekarên Erasmûsê nayên vir ji bo ku xwendina xwe bikin û çanda xwe berfireh bikin, ew tenê ji bo herin şahiyan û ji bo vexwarina alkohohlê tên. Ji sedî 90ê wan tenê ji bo kêxweşiyê tên, ew weke tûrîstan diçin cîhên dîrokî û wêneyan ji xwe re dikşînin.

Memo li pêşiya avahiya zanîngeha Porto

Memo bajarê Portoyê ji bo xwendina xwe hilbijart, ji ber ku ew ji avjeniyê pirr hez dike û dixwest okyanûsê bibîne, herwiha ji bo ku nêzîkî xwişka xwe bibe ku li paytext Lissabonê dijî. Hin hevalên wî yên kurd jî bi rêya bernameya Erasmûsê li Almanya û Polonyayê xwendina xwe dom dikin: “Ev cara yekemîn bû ku ez ji Tirkiyeyê derdikevim, ev jî fersendek baş bû ji bo naskirina çandên din, bajarên din û fêrbûna zimanên din.”

Tirkiye bê Kurd û neteweyên din wê bibe sifir

Memo dema ku ji hevalên xwe re behsa Tirkiyeyê dike, zêde balê dikşîne ser pirsa kurdî li Bakurê Kurdistanê: “Tirkiye welatekî pirr mezin e, lê mezinbûna vî welatî ne tenê Tirk çêdikin, herwiha para gelê kurd jî heye, Ermenî û neteweyên din jî mezinahiya Tirkiyeyê ava kirine. Ku tu Kurdan û neteweyên din ji Tirkiyeyê derxînî, wê ev welat bibe sifir.” Memo boçûnên xwe bi îngilîzî tîne ziman lê di nav axaftina xwe de peyvên kurdî bi lêv dike. Dema li Stembolê bû, ew diçû kursa zimanê kurdî û ji bo kurdiya xwe xurt bike herdem stranên hunermend û komên kurdî guhdar dike: “Ez herdem Şivan Perwer, Ciwan Haco, ku ez diramin ew yek ji mezintirîn hunermendên Rojhilata Navîn e, her wiha koma Agirê Jiyan û Koma Azad guhdar dikim”.

Li dîskotekan jî ez xwendekarên Ewropî fêrî dansa kurdî dikim

Di xwepêşandana li pêşiya avahiya zanîngeha Portoyê em pêrgî Siwar Mihemed jî hatin. Ew ji Rojavayê Kurdistanê, ji herêma Kurdaxê ye. Siwar li Spanyayê endezeya xwarinê dixwîne û ev bûn sê meh ku hatiye Portoyê. Siwar gellek çalakiyan çêdike ji bo ku çanda kurdî bide nasîn, bi kû ve herê, ew behsa Kurd û Kurdistanê dike. Çend caran jî di televîzyona portugalî de behsa êş û azara Kurdan kiriye, nemaze ya Kurdên Rojavayê Kurdistanê: “Kurd li vir tine ne û ti portugalî wan nas nakin. Ji ber wê jî çi fersend bi dest min dikeve, ez qala pirsa kurdî dikim, heyanî dema em diçin dîskotekan, yan jî şahiyên Erasmûsê, ez xwendekarên ewropî fêrî dansa kurdî dikim û em govendê digrin.” Siwar boçûna xwe li ser xwendekarên Erasmûsê wiha tîne ziman: “Ev program fersendekê dide xwendekaran ku li kêleka xwendina xwe sûdê ji mayîna xwe li welatê mêvandar werbigrin, daku ziman û çandên nû nas bikin. Hinek vê fersendê bi dest dixin û xwe pêş dixin, hinek jî wextê xwe di tiştên vala de wenda dikin.”

Siwar û li paş bajarê Porto

Siwar aşiqê vî bajarî bûye û hez dike bo demeke dirêj li vir bimîne. Ew dibêje ku Portugalî pirr dişibin Kurdan û ji ber wê ew pirr xerîbiyê hest nake: “Ez wiha hîs dikim weke ku ez di nav xelkê xwe de me”. Siwar hêvî dike ku di navbera Kurdan de, nemaze Herêma Kurdistanê û Portugalê de, pêwendiyên çandî çêbibin: “Herdu netew xwedî çandên dewlemed in û divê em pirên hevaltiyê di navbera van herdu netewan de saz bikin” û wiha pêde diçe: “Xwedenkarên kurd dikarin roleke baş di danasîna çanda kurdî de bilîzin. Li vir xwendekarên ewropî di şahiyên Erasmûsê de xwarinên welatê xwe çêdikin û li ber maseyên xwe ala xwe radixînin, dansa xwe jî dikin û wiha çanda xwe bi xwendekarên din didin naskirin”.

Jêder: http://www.rudaw.net/kurmanci/nuce/13485.html

Advertisements

Read Full Post »

Read Full Post »

%d bloggers like this: